ЗТАЖЯ, “УБТЗ” хувь нийлүүлсэн ний­гэмлэ­гээс гаргасан хүсэл­тийн да­гуу 2007 оны дөрөвдүгээр сарын 25-наас зургадугаар сарын 5-ны хооронд Налайх дүүр­гийн төмөр замын аюул­гүйн бүсэд нүүрс олборлож буй далд уурхайнуудыг мэр­гэж­лийн байгууллага шалга­хад дараахь дүгнэлтийг гар­гажээ. Үүгээр хэмжилт хийх боломж­той найман далд уур­хай, аюулгүйн бүсэд буй 25 уурхайн байршлыг тогтоож төмөр за­мын суулт хийсэн хэсгийг тогтоосон байна. Уг хэм­жилтээр “Отгонтэнгэр” ХХК, 33-37 метр, “Эхийн сэт­гэл” ХХК 60 метр, иргэн Тороо 35-50 метр төмөр замын гүнд ухаж бай­гаа нь тогтоогдсон байна. Энд мөн ил уурхайг хувьчилж авсан “Баялаг-Налайх” ХХК-ийн төмөр за­мын хамгаалал­тын бүсийг хамарсан 4-5 пласт байгааг илрүүлжээ. Тэндхийн оршин суугчдын нотолж байгаагаар хувь хү­мүүс болон компаниуд бүгд төмөр замын доогуур хам­гаалалтын бүсэд нүүрс ол­бор­лож байгаа хэмээн ба­талж байгаа аж. Энэ бүхнээс үзэ­хэд нүүрс олборлож за­рахын төлөө амь тавин зүт­гэгч­дийн газар доогуур ухаж байгаа нүх цооногуудын байр­шил, тоо баримжаа ч алдагд­сан байна. Өдгөө Налайх дүүргийн төмөр зам нь нүүрс олборлож бай­гаа талбайн хэсэгт нэг метр хүртэл доош сууж галт тэрэг зорчиход цөмөрч аваар гарах хэм­жээнд хүрээд байгаа нь айдас төрүүлж байна. Сал­барын яамнаас дээрх нөхцөл байд­лыг Улсын мэргэжлийн хя­нал­тын газар, Онцгой байд­лын Ерөнхий газарт удаа дараа мэдэгдсэн ч дорвитой арга хэмжээ авалгүй өдийг хүрчээ. Өнөө маргаашгүй Налайхын төмөр замыг ЗТАЖЯ-наас арга буюу хаа­хаар болсон байна. Галт тэрэг осолдож эрдэнэт хүний амь нас, эд хөрөнгө хохирч бол­зош­гүй тул ийнхүү 70 жилийн өмнө баригдсан Монголын анхны төмөр зам хаагдах нь тодорхой болжээ.  Л.Моломжамц