Өнгөрсөн хоёрду­гаар сард болсон БНАСАУ-ын цөмийн хөтөлбөрийн асууд­лаарх зургаан талт хэлэлцээ­рийн үеэр БНАСАУ, Японы харилцааг хэвийн болгох ажлын хэсгийг байгуулсан юм. Энэ удаагийн хуралдаан нь хоёр хоног үргэлжлэх гэнэ.  Японы төлөөлөгчдийн ах­лагч Иосики Минэ сэтгүүл­чидтэй уулзахдаа “Японы хулгайлагдсан иргэдийн асууд­лыг шийдэхгүйгээр хоёр улсын харилцааг хэвийн болгох талаар ярих ямар ч боломжгүй. Бид БНАСАУ-д тодорхой арга хэмжээ авах хүсэлт тавих болно” гэжээ. Харин БНАСАУ-ын төлөөлөгч­дийн тэргүүн Сон Ил Хо энэ удаагийн уулзалт тодорхой үр дүнд хүрнэ гэдэгт найдаж байгаагаа илэрхийлэв.   1970-80-аад онд БНАСАУ-ын тусгай албаны хул­гайл­сан Японы иргэдийн асууд­­лыг хэлэлцэх гол асууд­луудын нэг аж. БНАСАУ-ын төлөөлөг­чид Япо­ны 31 иргэнийг хул­гайл­сан гэдгээ хүлээн зөв­шөөр­­сөн байна. Тэднээс та­выг нь нутаг руу нь буцааж, үлдсэн найм нь Пхеньянаас ирсэн төлөөлөгчдийн ярьс­наар хор­воогийн мөнх бусыг үзүүл­жээ. Тиймээс БНАСАУ-ын тал энэ асуудлыг хаагдсан хэмээн үзэж байгаа юм. Ха­рин Токио хулгайлсан хүний тоо нь үүнээс олон гээд тэднийг даруйхан нутаг руу нь буцаахыг шаардав. Энэ асуудлыг шийдэхгүй бол Пхеньянд ямар нэгэн тус­ламж үзүүлэх, тэр дундаа БНАСАУ-ын дулааны цахил­гаан станцуудад мазут ний­лүү­лэх асуудлыг хэлэлцэх­гүй гэжээ.  Хоёр талын ажлын хэсгийн анхны хуралдаан өнгөрсөн гуравдугаар сард Вьетнамын нийслэл Ханой хотноо бол­сон. Энэ үеэр төлөөлөгчид өөрсдийнхөө байр сууринаас ухраагүй тул ямар ч үр дүнд хүрээгүй. Улаанбаатарт болж буй хуралдааны өмнөхөн Японы тал БНАСАУ-ын та­лаар баримталдаг бодлогоо зөөллөжээ. Японы ГХЯ-ны сайд Нобутака Матимура байгалийн гамшигт нэрвэгд­сэн БНАСАУ-д хүмүүнлэгийн тусламж үзүүлэх асуудлыг 2004 оноос хойш анх удаа хэлэлцэж байгаа тухай мэ­дэгд­сэн байна. Харин Японы Засгийн газрын ерөнхий на­рийн бич­гийн дарга Каору Иосано энэ асуудлыг улс төрөөс тусад нь авч үзэх нь зүйтэй гэж үзэж байгаа талаар “РИА Новости” мэдээллээ.