Сэлэнгэ мөрнийг эргийн хоёр талд ачаа, зорчигч буулгах зогсоол бүхий байгалийн чулуун хамгаалалтыг мөн байгуулжээ. ЗТАЖ-ын сайд Ц.Цэнгэл тэргүүтэй ажлын хэсэг хүрэлцэн очиж уг бярваазыг ашиглалтад хүлээн авсан байна. Бярвааз тависнаар Булган аймгийн газар тариалангийн бүс нутгаас үр тариа тээвэрлэхэд чухал ач холбогдолтой болж байгаа аж. Өмнө нь Сэлэнгэ сумын төв хүрэхэд Эрдэнэт, Хялганатын гүүрээр гарч 180-аад километр тойрч очдог байсан төдийгүй зарим үед иргэд амь дүйж тракторын дугуйны олгой хийлж Сэлэнгэ мөрнийг гаталдаг байжээ.  Л.Жамц  Залуу удирдагчдын чуулган өнөөдөр эхэлнэ Залуу удирдагч, ажил хэ­рэгч хүмүүсийн үүсэл са­наач­илгаар байгуулагдсан Жи Си Ай хэмээх дэлхийн хол­бооны Монгол дахь “Жи Си Ай” аравдугаар үндэсний чуулга­наа өнөөдөр эхэлж байгаа юм. “Залуучуудын хөгжил-Мон­голын гарц” уриан дор явагдах тус чуулганаар залуучуудад зориулсан “Бодлыг чиг­лүү­лэгч зургаан малгай”, “Бусдын туслалцаатайгаар зорилгодоо хүрэх нь” зэрэг сургалт боло бусад арга хэмжээ зохион байгуулах аж. Үндэсний чуул­ганд Дархан, Эрдэнэт, Улаан­баатар хотын 400-гаад тө­лөөлөгч оролцох гэнэ. Даш­рамд хэлэхэд “Дэлхийн Жи Си Ай” холбоо нь эг­нээндээ 1320 улсын зургаан мянга гаруй залуусыг нэгтгэсэн бөгөөд 1944 онд байгуулагдаж байжээ. Т.Гэрэл    Жүдочдоо ДАШТ-д үдэв Бразилийн Рио-де-Жа­нейро хотноо энэ сарын 16-нд эхлэх жүдо бөхийн ДАШТ-д оролцох манай бөхчүүдийн хоёр­ду­гаар ээлж өнөөдөр эх орноо­соо мордоно. Үүнтэй холбог­дуулан Биеийн тамир, спор­тын улсын хорооны дар­га Ч.Наранбаатар, Монголын жүдо бөхийн холбооны ерөн­хий­лөгч, УИХ-ын гишүүн Х.Бат­тулга тэргүүтэй албаны хү­мүүс бөхчүүдийн бэлт­гэлтэй танилцан жүдоч­доо үдэх арга хэмжээ зохио­лоо. Спортын төв ордны “Б” заа­ланд болсон тус уулзал­тын үеэр ДАШТ-д зодоглох бөх­чүүдийн зардал мөнгөний асуудал хэрхэн шийдэгдсэ­нийг танилцуулсны зэрэгцээ тамирчдад амжилт хүсэв. Сонирхуулахад, манай жүдо­чид зуны олимпийн их наад­маас өмнө олон улсын 13 томоохон тэмцээнд оролцож, эрхийн оноо цуглуулах аж. Одоогоор Бразилд болох дэл­хийн аварга шалгаруулах тэмцээн 10 дахь нь юм байна. Уулзалтын төгсгөлд ДАШТ-д оролцох баг тамирчдадаа Египетийн Каир хотноо үзүүл­сэн амжилтын буухиагаа тас­лах­гүйн зэрэгцээ медалийн тоогоо ахиулахыг сануулав. Мөн энэ үеэр Монгол Улсын гавьяат дасгалжуулагч Ч.На­сан­­тог­тохтой уулзахад “Энэ тэмцээний өм­нө бөхчүүдийн маань бие бялдар, сэтгэл санааны хувьд бэлтгэл нь хэдийнэ хангагд­сан. Өндөр амжилт гаргаж, олимпийн эрхийн оноогоо нэмэх, ме­далийн болзол хан­гах зорил­готой байна” хэмээсэн.  Софт теннисчид Солонгосыг зорилоо БНСУ-ын Ансонг хотноо энэ сарын 9-13-ны өдрүүдэд дэлхийн софт теннисний аварга шалгаруулах XIII удаагийн тэмцээн зохиогдох билээ. Нийт 45 орны баг, тамирчид өрсөлдөх тус тэмцээнд манай улсаас 20 гаруй төлөөлөгчийн бүрэлдэхүүнтэй баг оролцохоор өнөөдөр эх орноосоо мордож байна. Багийн бүрэлдэхүүнд Биеийн тамир, спортын улсын хорооны дарга Ч.Наранбаатар багтсан бөгөөд ахлагчийн үүрэг гүйцэтгэх аж. Харин тамирчдын хувьд Япон улсад бэлтгэл сургуулилт хийсэн Л.Тэмүүжин, У.Баясгалант, Г.Энхтүвшин, М.Ану­дарь нар багтжээ. Тэднээс гадна Э.Энхмөнх, Х.Бакытжан нар ДАШТ-д шүүгчээр оролцох юм байна. Сонирхуулахад, 1999 онд Тайландын нийслэл Бангкок хотноо болсон XI удаагийн дэлхийн аварга шалгаруулах тэмцээнээс манай софт теннисчид хүрэл медаль хүртэж байсан уламжлалтай.  Б.БАДМАА  Зүүн хойд Ази, Сибирийн бөөгийн соёлыг дэлгэв “Өвөг дээдсийн сүнс хэн­гэргийн аялгуунд” нэртэй бөөгийн эд өлгийн зүйлсийн үзэсгэлэн Үндэсний түүхийн музейд тавигдаж түүх, соёл сонирхогчдын анхаарлыг тат­саар байна. Эрхүү мужийн орон нутгийг судлах музейн үнэт үзмэр Зүүн хойд Азийн болон Сибирийн ард түмний бөөгийн соёлын хэрэгслийн цуглуулгыг ийн дэлгэжээ. Яхад, буриад, урианхай зэрэг ард түмний бөөгийн ховор нандин цуглуулга болох гу­тал, энгэрэвчтэй тэрлэг, мал­гай товшуур, хонх зэрэг олон эд зүйлийг эндээс үзэж болох аж. Тухайлбал, 1894 онд яхад наймаачин П.И.Захаров, ху­дын буриадуудын тайж Зая­ха­нов нар анхны хувцсыг үзэсгэлэнд өгсөн түүхтэй. М.Н.Хангалов, Н.Н.Агапитов нар Балаган, Верхолен, Эр­хүүгээс бөөгийн хэрэгс­лүү­дийг мөн цуглуулж, тайлбар бичиж үлдээжээ. 1930-аад он гэхэд бөөгийн үзэсгэлэнгийн ихэнх цуглуулга бүрдэж амж­сан байна. Бөөгийн шашны уламжлалтай монголчуудын хувьд энэхүү үзэсгэлэн нь нэн сонирхол татахуйц юм. Л.Жамц