Үүнтэй холбогдуулан ОХУ-аас манай улсад суу­гаа Онц бөгөөд Бүрэн эрхт Элчин сайд Б.А.Говорин, Монгол Оросын найрамдлын ний­гэмлэгийн тэргүүн, УИХ-ын Ж.Гүррагчаа нар өчиг­дөр хэвлэл, мэ­дээллийн төлөөлөгчдийг хүлээн авч уулзлаа. Анх Октябрийн хувьсгал ял­сны 35 жилийн ойд зо­риулан зохион бай­гуул­сан найрамдлын сар энэ жил 47 дахь удаагаа болж бай­гаа гээд Элчин сайд түү­хийг эргэн дурс­лаа. Энэ жилийн най­рамд­лын сарын хүрээнд Улаан­баатар Дархан хот, Говь-сүм­бэр, Хэнтий, Дунд­говь, Өмнөговь аймагт нэлээд ажил зо­хион байгуулах юм байна. Гэвч хэдхэн хо­но­гийн өмнө хоёр улсын ГХЯ-ны сайдуудын Москва хотноо хийсэн хэлэлцээ, хоёр улсын иргэд харилцан визгүй зорчих болсон зэ­рэг асууд­лыг энэ үеэр хэв­лэлийнхэн ихээхэн со­нир­хож байлаа. Ингээд Элчин сайд Б.А.Говорин манай сурвалжлагчийн асуултад хариулсан юм аа.  -Манай хоёр ул­сын ГХЯ-ны сайдууд саяхан Мос­квад хэлэлцээ хийхэд та байлц­сан. Энэ уулзалтаар визээс гадна ямар асууд­лаар ярил­цав?   -Энэ нь хоёр талын хам­тын ажиллагааны өргөн хү­рээг хөндсөн нэлээд чухал уулзалт юм. Танай ГХЯ-ны сайд Н.Энхболд Монголын өнөөгийн байдлын тухай ма­най сайд С.Лавровт мэ­дээл­сэн. Түүнээс гадна С.Лавровт ГХЯ-ны сайдаар дахин томилогдсон явдалд баяр хүр­гээд хоёр талын хамтын ажил­­лагааны талаар Мон­голын тал ямар байр суурь­тай байгаагаа та­нилцуулсан. Өнгөрсөн оны арван­хоёр­дугаар сард Ерөн­хийлөгч Н.Энхбаяр манай улсад ал­бан ёсны айлчлал хийснээс хойш хамтын ажиллагаанд ямар ахиц гарсан тухай ч ярьсан. Энэ хугацаанд олон чухал асуудлыг шийдсэн. Нэгд, уулын баяжуулах “Эрдэнэт” үйлдвэрийн талаар хоёр улсын Засгийн газар хооронд хамтран ажиллах гэрээнд гарын үсэг зурсан. 2003 оноос хойш энэ гэрээнд гарын үсэг зураагүй байсан юм. Мөн “Монголросцветмет” хам­­тарсан нэгдлийн үйл ажиллагааны талаар шинэ гэрээ байгуулсан. Хоёр сайд УБТЗ-ын гэрээг улам бо­ловсронгуй болгох асуудалд нэлээд анхаарал хан­дуул­сан. Олон талын хамтын ажил­лагаатай холбоотой асууд­­лыг ч хөндөж, НҮБ-д шинэчлэл хийх шаардлагатай байгаа талаар бас ярилцсан. С.Лавров сайд хамтарсан үйлд­­вэрийн талаарх манай байр суурийг сайд Н.Энх­болдод танилцуулсан. Аль аль талынх нь ашиг сонирхлыг хохироохгүй байх ёстой гэд­гийг ч онцлон дурд­сан. Бид ч УБТЗ-д шинэчлэл хийх та­лаар ямар байр суурьтай байгаагаа илэрхийлсэн. Хоёр тал ирэх арваннэгдүгээр сард Улаан­баатарт хотноо компаниудын хамтын ажил­лагааг дэмжих чуулганыг зохион байгуулах шаард­лагатай гэдэг дээр санал нэгдсэн юм. Хамгийн гол нь уг арга хэмжээг жил бүр зохион байгуулдаг уламж­лалтай болгоосой гэдгийг хоёр тал дэмжсэн.  -Манай уул уурхайн сал­барыг ОХУ нэлээд сонир­хож байгаа. Энэ сал­барт хөрөнгө оруулалт хийх талаар яригдсан уу?  -Тэгэлгүй яахав. Манай улсын болон хувийн ком­паниуд танай уул уурхайн салбарт хэрэгжиж буй янз бүрийн төслүүдэд хөрөнгө оруулалт хийхийг Оросын Засгийн газар дэмжиж бай­гаа. Монголын тал ч хөрөнгө оруу­лалт хийх асуудлыг аль болох түргэн шийдэж өгнө гэдэгт бид найдаж байгаа.   -Манай хоёр улсын ир­гэд хэзээнээс харилцан визгүй зорчих вэ?  -Гэрээнд гарын үсэг зу­рангуут. Одоо эдгээр бичиг баримтыг бэлэн болгохоор хоёр тал ажиллаж байгаа бөгөөд ямар нэгэн асуудал гарахгүй гэж бодож байна.